A falta de cen días para o inicio do Mundial de Duatlón Pontevedra 2014, inaugurouse a páxina web do campionato (www.pontevedraduatlon2014.com). Dende o día de hoxe todas e todos os deportistas e persoas interesadas poderán visitar a web e coñecer un pouco mellor a cidade, as probas, prezos de inscrición ou hoteis.
A páxina web será o instrumento de comunicación do Mundial cos participantes nas diferentes probas, xunto co facebook (www.facebook.com/pontevedraduathlon) e o twitter do campionato (@ITUDUATHLON2014). Na mesma hai información de interese para os duatletas, tanto dos circuítos, datas e horarios, inscricións, hoteis ou voluntariado. Ademais, será un interlocutor cos medios de comunicación interesados no seguimento do evento.
Inscrición. Hai que recordar que xa están aprobadas as as cotas de inscrición para os duatletas participantes. Para os estranxeiros o custe de participación será de 155 euros (menos que no último campionato do Mundo celebrado en Canadá), mentres que para os duatletas españois e portugueses o custe será de 100 euros. Os interesados poden inscribirse a través da páxina web do campionato.
