O calendario internacional de tríatlon afronta as súas últimas citas e, esta fin de semana, Punta del Este (Uruguai) acolleu o Campionato Iberoamericano de Tríatlon, celebrado en distancia sprint e coa participación de tres representantes españois: un triatleta na categoría masculina e dúas na feminina.
Na proba feminina tomaron a saída 26 deportistas. A natación desenvolveuse nun grupo moi estirado, aínda que o segmento ciclista permitiu reagrupar o pelotón e deixar a resolución final para a carreira a pé. Nese último sector, a brasileira Giovanna Lacerda mostrouse máis forte e levou o triunfo por só catro segundos sobre a galega do Club Deportivo Delikia, Natalia Castro, que asina un brillante final de tempada e faise coa medalla de prata tras impoñerse ao sprint á mexicana Natalia Casas, terceira clasificada.
En categoría masculina, o triatleta canario Vicente Hernández proclamouse campión iberoamericano, acadando ademais a segunda posición na clasificación xeral da proba.
Paralelamente, a mesma fin de semana disputouse en Dubai a primeira Copa do Mundo exclusivamente feminina de tríatlon, un fito no calendario internacional. A asturiana con licenza galega María Alzaga completou unha destacada actuación entrando en meta na décima posición.
