Tríatlon Ferrol repetiu triunfo por segundo ano consecutivo no Campionato de España de Tríatlon de Relevos, na categoría feminina. O club galego volveu hoxe a ser o mellor por diante do Diablillos de Rivas, nun campionato celebrado en Elche.
A especialidade de relevos é unha competición de clubs, no que están representados por equipos de tres triatletas que terán que facer cadanseu mini-tríatlon (300 metros de natación, 8 quilómetros de bicicleta e 2 quilómetros de carreira a pe) e se suman os tempos dos tres deportistas. O equipo do Tríatlon Ferrol estaba formado por Melina Alonso, Laura Gómez (que entrou en substitución de Miriam Casillas, lesionada) e Tamara Gómez.
