As Ligas Nacionais de Tríatlon Iberdrola e Suzuki puxeron o punto e final á tempada esta fin de semana en Arenales del Sol (Elx), escenario das dúas últimas xornadas de competición.
A antepenúltima xornada disputouse o sábado 12 de setembro coa celebración do Campionato de España de Tríatlon SuperSprint por Clubs, onde se impuxeron o CEA Bétera na categoría feminina e o Peñota Dental Tríatlon na categoría masculina. Durante a tarde tivo lugar a penúltima xornada, correspondente ao Campionato de España de Tríatlon por Remudas Mixtas, cunha nova vitoria para o CEA Bétera.
Os resultados destas probas mantiveron a emoción ata o último momento, con clasificacións xerais moi axustadas. Antes da xornada definitiva, apenas 13 puntos separaban ao Cidade de Lugo Fluvial e ao Club Deportivo Delikia na Liga Iberdrola, mentres que na Liga Suzuki a diferenza entre o Peñota Dental Tríatlon e o Cidade de Lugo Fluvial era de tan só 4 puntos.
A sétima e última xornada celebrouse co Campionato de España de Tríatlon SuperSprint 2×2, onde volveron impoñerse o CEA Bétera na categoría feminina e o Peñota Dental Tríatlon na masculina. Estes resultados confirmaron de maneira definitiva as vitorias do Cidade de Lugo Fluvial feminino na Liga Iberdrola 2026 e do Peñota Dental Tríatlon na Liga Suzuki 2026.
Liga Iberdrola: título para o Cidade de Lugo Fluvial
O Cidade de Lugo Fluvial feminino proclamouse campión da Liga Iberdrola de Tríatlon 2026, levando o título estatal ata Lugo tras unha tempada de gran regularidade. O podio final completárono as valencianas do CEA Bétera, na segunda posición, e o Club Deportivo Delikia, que asegurou unha destacada terceira praza para o tríatlon galego.
Entre o resto dos clubs galegos, o AD Náutico de Narón rematou na sétima posición, garantindo a súa continuidade na Primeira División nacional. Pola súa banda, o Tríatlon Inforhouse Santiago concluíu na décimo terceira posición, resultado que supón o seu descenso á Segunda División para a vindeira tempada.
Liga Suzuki: subcampionato para o Cidade de Lugo Fluvial masculino
Na Liga Nacional de Clubs Suzuki masculina, o Cidade de Lugo Fluvial pechou a tempada cun brillante subcampionato, rematando a tan só oito puntos do campión, o Peñota Dental Tríatlon. A terceira posición foi para o Club Deportivo Delikia, que completa así unha excelente tempada no seu debut na Primeira División nacional.
O Tríatlon Inforhouse Santiago finalizou na quinta posición, asegurando a súa permanencia na máxima categoría. O AD Náutico de Narón concluíu na décimo quinta posición, o que supón o seu descenso á Segunda División, mentres que o AD Fogar rematou noveno na clasificación da Segunda División. Pola súa banda, o Club Triatlón Ferrol masculino finalizou na décimo cuarta posición da Segunda División, polo que competirá na categoría de Promoción durante a tempada 2027.
As clasificacións completas do Campionato de España de Tríatlon SuperSprint 2×2 e das Ligas Nacionais poden consultarse nas canles oficiais da Federación Española de Tríatlon.
