Tras a celebración da Toma de Tempos de Tríatlon Paralímpico o pasado 22 de febreiro en Alcobendas, Madrid, e o estudo dos aspirantes, as súas clases deportivas e a súa posible proxección, desde a Federación Española de Tríatlon anunciouse o novo Equipo CaixaBank de Promesas Paralímpicas de Tríatlon 2025.
Entre os novos integrantes atópanse dúas triatletas paralímpicas galegas, Claudia Tubío Quintáns do Club Tríatlon Rianxo e Carla Santoro Cernadas do Club Deportivo Delikia. Claudia Tubío xa foi integrante do equipo CaixaBank na tempada 2023-2024 e debutou competindo na súa terra na Copa do Mundo de Tríatlon Paralímpico, que se celebrou o pasado mes de xuño de 2024 en Vigo, Galicia. Carla, pola súa banda, debuta no tríatlon paralímpico e faino da man e co apoio deste programa.
O Equipo CaixaBank de Promesas Paralímpicas de Tríatlon é un proxecto conxunto da Federación Española de Tríatlon e do Comité Paralímpico Español que se puxo en marcha en setembro de 2020 para promocionar triatletas con discapacidade que poidan ir nutrindo no futuro á selección española, coa vista posta nos pasados Xogos de París 2024 e en Los Ángeles 2028.
Tanto Claudia como Carla e o resto dos membros deste equipo participarán regularmente en concentracións na tempada 2025-2026, nas que se someterán a adestramentos de iniciación e técnica en todos os sectores e transicións, e recibirán formación en diferentes áreas como clasificación, nutrición e mecánica.
