ESTA FIN DE SEMANA CELEBRARASE EN ALTAFULLA O CAMPIONATO DE ESPAÑA DE TRÍATLON SPRINT E O DE ACUATLÓN

22 de Maio de 2014

Esta fin de semana celebrarase en Altafulla (Tarragona) o Campionato de España de Tríatlon na distancia sprint e o Campionato de España de Acuatlón. En ambas probas, hai que destacar a enorme participación de deportistas galegos/as, a pesar das distancias.

O sábado celebrarase o Campionato de España de Tríatlon na distancia Sprint elite, sub 23, júnior e cadete. Comezaremos coas probas cadetes (10:30 horas) e cunha enorme participación. Na categoría masculina están inscritos 180 deportistas con máis de 20 galegos. Hai que destacar a presenza de Andrés Cendán (Dexter Compostela), que defenderá o título acadado o pasado ano (tamén en Altafulla). Na categoría feminina (10:32) hai 88 deportistas, das cales 15 son galegas, e moitas con opcións de loitar polos primeiros postos da clasificación. Inés Santiago (Tríatlon Ferrol) logrou o título o pasado ano e tentará repetir triunfo, aínda que enfronte terá á súa compañeira de club Carmen Gómez ou Carla Castaño (Arcade Inforhouse), as nosas cadetes de ouro. As distancias son de 750 metros de natación, 10 quilómetros de bicicleta e 2 de carreira a pe.

Na categoría júnior (15:15), hai case cen inscritos na categoría masculina e 23 na feminina. E os galegos, con opcións. Antonio Serrat (Tri-Penta Terras de Lugo) foi o bronce no 2013 e tentará lograr o triunfo. Na categoría feminina, Galicia tamén terá opcións con deportistas coma Diana Cotón (Arcade), Xiana Rendo (Dexter) e Irene Serrat (Tri-Penta Terras de Lugo).

En elite hai participación galega e con ganas de loitar polo título. A carreira feminina comezará 12:00 horas e Melina Alonso (Tríatlon Ferrol) tentará repetir o título do 2013. A proba masculina (13:30 horas) conta con 100 inscritos e incluso lista de espera. E, entre os galegos, deportistas con opcións de acadar o podio, coma Pablo Dapena (Cidade de Lugo), Jesús Gomar (Cidade de Lugo), Brais Canosa (Arcade Inforhouse), Diego Paz (Arcade Inforhouse), Nan Oliveras (Tri-Penta Terras de Lugo) ou Ricardo Hernández (Tri-Penta Terras de Lugo). As distancias en júnior e elite son de 750 metros de natación, 20 quilómetros de bicicleta e 5 de carreira a pe.

Resultados 2013. Melina Alonso (Tríatlon Ferrol) proclamouse campioa de España sénior e sub 23, acompañada no podio sénior por Marta Jiménez (Wild Wolf) que foi prata. En júnior tamén houbo medallas para os deportistas galegos: Diana Cotón (Arcade Inforhouse) foi prata e Antonio Serrat (Wild Wolf Cidade de Lugo), bronce. Na categoría cadete, Andrés Cendán (Dexter Compostela) e Inés Santiago (Tríatlon Ferrol) proclamáronse campións de España.

Campionato de España de Acuatlón. O domingo será o momento do Acuatlón, no que participarán moitos dos participantes do día anterior. A proba cadete (09:00) comezará as nove da mañá e cunha importante inscrición (en masculina, 135 e na feminina, 71). As distancias son de 1,5 de carreira a pe, 500 metros de natación e 1,5 de carreira a pe). Galicia presenta serias opcións aos primeiros postos.

Ás 09:25 comezará a proba júnior masculina e cinco minutos despois sairán as chicas, e tamén nesta proba teremos posibilidades de podio. E a continuación, a proba de elite feminina (11:10), a masculina (12:10) e paralímpica (13:10).

Ano 2013. Galicia foi a absoluta dominadora do Campionato de España de Acuatlón, que se disputou en Águilas. Na categoría elite, Javier Gómez Noya e Aída Valiño lograron os títulos de campións de España, e o mesmo fixo Diana Cotón en xúnior feminino. Ademais, houbo medallas para Pablo Dapena (bronce) e Carmen Gómez e Andrés Cendán en cadete (bronce). Nas clasificacións de clubs elite, o Wild Wolf Cidade de Lugo proclamouse campión de España tanto na categoría masculina coma feminina.

Quizáis che interese…

Galegos con maiúsculas

Galegos con maiúsculas

Antonio Serrat, Susana Rodríguez, Antonio Benito, Cidade de Lugo Fluvial, Pablo Dapena e as...