O domingo 2 de xullo celebrarase a Copa de Europa de Tríatlon Sprint de Altafulla, que é ademais o Campionato do Mediterráneo, cunha importante presenza de triatletas galegos.
Na proba feminina, que comezará ás 11:15 horas, participarán Inés Santiago, Melina Alonso, Sara Guerrero ou Jocelyn Brea, nunha proba na que as nosas deportistas tentarán loitar polas primeiras posicións. Na masculina (13:00 horas) estarán no punto de saída os galegos Uxío Abuín, Alberto Castiñeira, Andrés Cendán, Diego Paz e Martín Carrera. Ademais hai que destacar que tamén participará en paratriatlon, categoría PT-VI (para deportistas con discapacidade visual) Susana Rodríguez Gacio, nesta oportunidade coa guía Paula García Godino.
As distancias serán de 750 metros de natación, 20 quilómetros de bicicleta e 5 de carreira a pe.
