IVÁN RAÑA, UNDÉCIMO NO MUNDIAL DE IRONMAN DE KONA

15 de Outubro de 2017

O ordense Iván Raña rematou onte na undécima posición do Mundial de Ironmán de Kona, despois de facer unha boa maratón que lle permitiu recuperar varias posicións.

O galego fixo unha moi boa natación, polo que saíu da primeira transición na sexta posición. Parecía que os plans de Raña se estaban a cumprir tal e coma el os deseñara, e nos primeiros quilómetros da bicicleta seguía no grupo de cabeza. Pero a partir do quilómetro 15 comezou a ir perdendo postos pouco a pouco. No quilómetro 50 ía na 13ª posición, pero no 95 era 26º. E así, neses postos estivo ata o remate da bicicleta (26º). Faltaba o terceiro e último segmento, no que moitos triatletas desaparecen, pero non foi o caso de Iván. O galego foi recuperando postos pouco a pouco ata alcanzar a undécima posición cun tempo final de 8:24:53.

O título de campión do mundo de Ironman foi para o alemán Patrick Lange, nunha edición na que se pulverizaron marcas. Patrick Lange logrou o mellor rexistro de todos os campionatos do mundo disputados ata o de agora cun tempo final de 8:01:27, e tras facer unha espectacular remontada na carreira a pe (era undécimo cando comezou a correr). Tamén se bateu o récord no segmento de bicicleta.

O campión do mundo das dúas últimas edicións, Jan Frodeno, sufriu molestias no inicio da carreira a pe, que case o obrigan a retirarse, pero o alemán decidiu que quería rematar a proba coma fose, así que continuou para chegar na 35ª posición.

Quizáis che interese…

Galegos con maiúsculas

Galegos con maiúsculas

Antonio Serrat, Susana Rodríguez, Antonio Benito, Cidade de Lugo Fluvial, Pablo Dapena e as...