Melina Alonso (Tríatlon Ferrol) e Andrés Cendán (Cidade de Lugo Fluvial) proclamáronse hoxe vencedores do XXVII Dúatlon Cidade de Lugo “Memorial Alejandro López”, que é a segunda proba do Circuíto Galego de Dúatlon de Estrada.
Na categoría feminina houbo unha fermosa loita entre Melina Alonso –gran favorita- e Iria Rodríguez –vencedora do pasado ano-. Ambas estiveron xuntas en cabeza durante toda a proba. Nos dous primeiros segmentos non houbo diferenzas e todo tivo que decidirse no terceiro sector de carreira a pe, no que Melina foi mellor. Así, o triunfo foi para Melina Alonso cun tempo de 01:05:39, mentres que segunda foi a júnior Iria Rodríguez (Atletismo Porriño) a pouco máis de vinte segundos (01:06:00). O terceiro posto foi para Inés Castaño (Arcade Inforhouse) a uns cinco minutos (01:10:50).
Andrés Cendán (Cidade de Lugo Fluvial) dominou a proba dende o primeiro segmento, no que foi o máis rápido e xa non abandonou esta situación privilexiada. No ciclismo acadou o cuarto mellor tempo e no terceiro sector volveu estar entre os máis rápidos. Así entrou en meta na primeira posición cun tempo de 57:34, mentres que segundo foi o júnior Marcos Ruíz (Tríatlon Ferrol) a algo máis dun minuto de distancia (58:49), que se impuxo nos metros finais a Alejandro Álvarez (Cidade de Lugo Fluvial), quen foi terceiro.
A proba, segunda do circuíto, celebrouse sobre a distancia sprint (5 quilómetros a pe, 20 quilómetros en bicicleta e 2,5 de carreira a pe). Na entrega de premios estiveron os fillos e o irmán de Alejandro López, ex directivo da Federación Galega de Tríatlon, que é homenaxeado neste dúatlon.
Os gañadores doutras categorías foron:
- Cadete: Andrea Trigo (Náutico de Narón) e Víctor Bouzón (Olímpico de Vedra)
- Júnior: Iria Rodríguez (Atletismo Porriño) e Marcos Ruíz (Tríatlon Ferrol)
- Sub 23: Ana María Santiso (Náutico de Narón) e Andrés Cendán (Cidade de Lugo Fluvial)
- Veterán 1: Susana Carreira (Cidade de Lugo Fluvial) e José Juan Cepeda (Olímpico de Vedra)
- Veterán 2: Laura López (Tri Ourense) e Ricardo García (Tríatlon Bierzo)
- Clubs: Náutico de Narón (feminino) e Cidade de Lugo Fluvial (masculino)
O Circuíto Galego de Dúatlon de Estrada 2017 está formado por cinco probas: Guitiriz, Cidade de Lugo, Riveira, Santiago e Arteixo. Está en xogo a clasificación para o Galego de Dúatlon, que se celebrará en Vigo o 9 de abril. Cristina Torres (Mar de Vigo) e Manuel Ángel Penas (Tríatlon Arteixo) proclamáronse vencedores do XI Dúatlon Concello de Guitiriz.
clasificacion defnitiva dulugo 2017 (1)
