Esta fin de semana comezará en Lugo e Vigo o programa “Nada e Corre” do 2015, unha iniciativa da Federación Galega de Tríatlon dedicada aos máis cativos.
O Nada e Corre de Lugo, clasificatorio para o Galego, celebrarase o sábado 7 de febreiro a partir das 16:30 horas na Piscina Municipal de As Pedreiras coa participación de 127 nenos e nenas (27 benxamíns, 42 alevíns, 27 infantís e 31 cadetes). A carreira terá lugar na pista de atletismo Pérez Rivera.
Pola súa parte, a proba de Vigo está prevista para o domingo 8 de febreiro no Complexo Municipal As Travesas coa inscrición de 100 participantes (18 benxamíns, 29 alevíns, 23 infantís e 30 cadetes).
Este programa, que comezou no 2012, está dedicado ás categorías benxamín, alevín, infantil e cadete e ten como obxecto traballar en inverno a natación, de forma moi especial, e a carreira, xa que os técnicos consideran importante traballar estes aspectos. Así o programa “Nada e Corre”, que se desenvolve nos meses de febreiro e marzo, está formado por catro probas clasificatorias zonais (Lugo, Vigo, Ribeira e Ferrol) e unha final. A final terá lugar o día 21 de marzo en Pontevedra e para a mesma clasificaranse de cada proba os catro mellores por categoría e sexo.
As distancias a realizar dependerán das categorías:
- Benxamín: 50 metros de natación e 500 de carreira a pe.
- Alevín: 100 metros natación e 500 carreira a pe.
- Infantil: 200 metros natación e 1.000 carreira a pe.
- Cadete: 400 metros natación e 2.000 carreira a pe.
