O SÁBADO 17 DE AGOSTO CELÉBRASE TRÍATLON POPULAR VILA DE ALLARIZ

15 de Agosto de 2013

O sábado 17 de agosto (18:00 horas) terá lugar o XXIV Tríatlon Vila de Allariz coa participación de 150 deportistas. Esta proba popular sempre ten unha magnífica resposta por parte dos triatletas e este ano volveu a suceder pechándose a inscrición máxima en só tres días.

 

A pesar de ser unha proba popular o certo é que ten unha enorme aceptación e en Allariz ao longo dos diferentes anos participaron os máis importantes deportistas galegos internacionais, coma Javi Gómez Noya, Saleta Castro, Aída Valiño ou Jesús Gomar. O pasado ano os vencedores da proba foron Saleta Castro (Cidade de Lugo Fluvial) e Pedro Antonio Esmorís (Muralla de Lugo). Na edición do presente ano, o Vila de Allariz preséntase moi aberto, sen favoritos claros. Podemos destacar a Silvia Veira (Arcade Inforhouse) e Alba Cuba (Wild Wolf Cidade de Lugo) na proba feminina, e Lucas Escaneo (Tríatlon Morrazo) ou Óscar Justo Villanueva (Motobike Pontevedra), entre outros.

 

A proba disputarase sobre as distancias de 750 metros de natación, 24 quilómetros de bicicleta e 5.500 metros de carreira a pe. A recollida de dorsais terá lugar na Alameda de Allariz e a proba disputarase nunhas paraxes espectacularmente belas. O segmento de bicicleta é duro, xa que a primeira parte do percorrido é en ascenso, mentres que na carreira a pe combinan parte de asfalto con camiños de pedra con algunha pendente.

 

Este ano celébrase a XXIV edición da proba e a organización está estudando a posibilidade de facer en 2014 unha proba relevante a nivel estatal para celebrar as vodas de prata do Vila de Allariz. Aínda queda un ano por diante, pero xa se están buscando alternativas adaptadas as condicións do entorno.

Quizáis che interese…