Galicia desprazará a 13 deportistas ao Campionato de España Individual de Péntatlon Moderno, que se celebrará o sábado 6 de xullo en Sant Boi de LLobregat (Barcelona). O obxectivo é regresar con moitas medallas no peto, porque os resultados da tempada auguran un bo resultado neste torneo. De feito hai uns días Aroa Freije logrou a primeira medalla europea para o péntatlon galego. O domingo celebrarase o Campionato de España de Biatlón.
A proba, que se celebrará en Sant Boi de Llobregat comezará as 13:30 horas e ao longo de toda a tarde as e os deportistas irán cubrindo as diferentes probas. Os benxamíns, alevíns e infantís realizarán as probas de natación e combinada (carreira e tiro con láser); mentres que os cadetes e xuvenís xa incorporan a especialidade de esgrima e por último, os júnior e sénior, realizarán todas as disciplinas (natación, esgrima, hípica e combinada). Tamén participará no Campionato de España Cristóbal Rodríguez, que actualmente está adestrando e preparando o Campionato de Europa. A dúbida será saber en que condicións chega, xa que viaxa o mesmo día da competición, polo que pode chegar canso.
No ano 2012 Galicia logrou nove medallas (4 ouros, 4 pratas e un bronce) no Campionato de España Individual de Péntatlon Moderno. Con estes resultados, Galicia repetiu o mesmo número de medallas do ano 2011, algo que parecía complicado.
Campionato de España de Biatlón. Este torneo, que vai pola súa novena edición, disputarase o domingo 7 de xullo en Sant Boi de Llobregat tamén en todas as categorías (dende benxamín a veteráns) e coa participación da mesma selección galega. As distancias no Campionato de España de Biatlón son diferentes segundo a categoría. Desta forma, en benxamín e alevín as e os participantes correrán 500 metros, nadarán 50 e correrán 500 metros. Os infantís deberán correr 500 metros, para despois nadar 100 metros e finalizar con 500 de carreira a pe. En cadete as distancias son 1.000-200-1.000, mentres que para as categorías xuvenil, júnior e sénior as distancias son as mesmas: 1.500-200-1.500. E xa para rematar, sinalar que na categoría máster as distancias son de 1.000 metros de carreira a pe, 100 metros de natación e 1.000 de carreira a pe.
A continuación, a convocatoria galega.
| PARTICIPANTES GALEGOS NO CAMPIONATO DE ESPAÑA INDIVIDUAL DE PENTATLON | |
| Benxamín masculino | Lucas Pena Cuesta |
| Alevín feminino | Andrea Vidal Lamas |
| Alevín masculino | Martín Freije Torneiro |
| Esteban Basanta Fouz | |
| Infantil femenino | Yolanda Rodríguez Fidalgo |
| Lorena Iglesias Andrade | |
| Infantil masculino | Javier Pena Cuesta |
| Cadete feminino | Aroa Freije Torneiro |
| Lúa Vidal Lamas | |
| Estela Díaz González | |
| Xuvenil masculino | Raul Blanco Porto |
| Joel Rois Rodríguez | |
| Júnior masculino (e absoluto) | Cristóbal Rodríguez Fidalgo |
