ANTONIO SERRAT, SÉTIMO NO EUROPEO DE TRÍATLON DISTANCIA SPRINT DE DÜSSELDORF

24 de Xuño de 2017

 Antonio Serrat (Tri-Penta Terras de Lugo) acadou a sétima posición no Campionato de Europa de Tríatlon distancia Sprint, que se celebrou en Düsseldorf (Alemaña). O vigués foi o mellor dos españois e realizou unha proba moi regular. Ademais, Inés Santiago foi 13ª na proba feminina e Uxío Abuín (Olímpico de Vedra), 17º.

Na proba feminina, Inés Santiago estivo sempre entre as mellores. Saíu da auga moi ben situada. Por diante ía un grupo de catro escapadas e a continuación outro de oito, no que se atopaba a galega. Inés, que estivo moi rápida na transición, na primeira volta logrou coller as que ían por diante e formouse un primeiro grupo cabeceiro dunhas 20 unidades aproximadamente. Así, chegaron á segunda transición con este pelotón en cabeza e o segundo, a aproximadamente 1 minuto de distancia. A galega fixo unha mala transición e veuse obrigada a remontar na carreira a pe. Pero Inés non é de renderse, así que foi escalando postos dende a última posición do seu grupo ata chegar a meta na 13ª posición cun tempo final de 01:04:41.

Na categoría masculina, outra moi boa actuación de Antonio Serrat, que volveu a ser protagonista na proba. O vigués fixo unha moi boa natación e saíu da auga no sexto posto, mentres que Uxío Abuín perdeu bastantes segundos, o que lle obrigou a facer un esforzo extra para incorporarse ao grupo principal.

Na bicicleta, con algo de choiva o que facía o circuíto máis perigoso, formouse un grupo de máis de vinte unidades e nel estaban os dous galegos dispostos a loitar por todo. Como ven sendo habitual, Serrat estivo moi activo e moi ben colocado durante o ciclismo, para evitar que calquera posible ataque o deixara fóra da loita polas medallas. Desta forma, así chegaron a T-2 con todo por decidir.

O título e as medallas decidíronse ao sprint e con Serrat no grupo. Impúxose a velocidade de Joao Pereira, que repite título europeo, mentres que Antonio Serrat rematou nunha meritoria sétima posición (57:48) a só dez segundos da medalla de bronce. Pola súa banda, Uxío Abuín non se atopou ben na carreira a pe e chegou na 17ª posición, cun tempo de 58:34. O terceiro español, David Castro, que quedou cortado na bicicleta, foi 28º.

Quizáis che interese…

Galegos con maiúsculas

Galegos con maiúsculas

Antonio Serrat, Susana Rodríguez, Antonio Benito, Cidade de Lugo Fluvial, Pablo Dapena e as...