Camila Alonso (Tríatlon Ferrol) e Diego Paz (Arcade Inforhouse) proclamáronse hoxe campións galegos de tríatlon de distancia olímpica no transcurso do IV Tríatlon Concello de Riveira. Ademais tamén se celebrou o Galego de Duatlón Escolar Cadete con Salomé Calviño (A.D. Fogar) e Iván Puentes (Escola Javier Gómez Noya) como vencedores.
Na categoría feminina non houbo grandes sorpresas. Camila Alonso partía como unha das grandes favoritas e quixo cumprir co seu papel. Así liderou a proba xunto a súa irmá Melina dende a natación e xa non deixou esa posición ata o final da carreira, cando entrou en meta cun tempo final de 02:11:39. A segunda posición foi para Melina Alonso (Tríatlon Ferrol) cun tempo de 02:12:54, quen fixo o mellor parcial na carreira a pe, pero perdera as súas opcións de acadar a vitoria no segmento de bicicleta. A terceira praza e medalla de bronce no galego recaeu en María Martínez (Atletismo Porriño) que arrastrou as consecuencias dunha mala natación, que a deixou moi lonxe das dúas primeiras triatletas.
Na proba masculina, houbo unha gran disputa polas primeiras posicións, aínda que de inicio o venezolano Luismi Velásquez (Tri-Penta Terras de Lugo) mandaba con facilidade. Así, foi o mellor na natación e na bicicleta, aínda que por detrás Diego Paz (Arcade Inforhouse), David Mendoza (Cidade de Lugo Fluvial) e Andrés Cendán (Cidade de Lugo Fluvial) non deixaban que as distancias fosen definitivas. Así, Velásquez chegou á segunda transición con case un minuto da vantaxe sobre este grupillo de perseguidores, pero non foi suficiente para manter esta primeira posición na carreira a pe. O mexicano do Cidade de Lugo Fluvial, David Mendoza, logrou alcanzar e superar a Luismi e confirmar así o triunfo no IV Tríaton Concello de Riveira cun tempo de 01:50:44, mentres que segundo fou Luismi Velásquez (01:51:04) e a terceira posición e o título de campión galego foi para Diego Paz cun tempo final de 01:51:35, que revalidou o título.
O podio do Campionato Galego quedou formado por: Diego Paz (1º); Andrés Cendán (2º) e Alberto Castiñeira (3º).
Duatlón Escolar. Ao remate do IV Tríatlon Concello de Riveira celebrouse o Campionato Galego de Duatlón Escolar Cadete cos triunfos de Salomé Calviño (A.D. Fogar) e Iván Puentes (Escola Javier Gómez Noya). Os participantes tiveron que realizar 2 quilómetros de carreira a pe, 8 quilómetros de bicicleta e 1 de carreira a pe. Na proba participaron 42 deportistas.
Clasificación Du escolar Riveira
