Impresionante actuación de Carmen Gómez no Campionato de Europa júnior de Tríatlon, que se disputou hoxe en Kitzbühel (Austria). A galega, que aínda é cadete, logrou a quinta posición, despois de estar toda a proba no grupo de cabeza. Non tiveron a mesma sorte as representantes galegas en elite feminina, xa que tanto Melina Alonso coma María Ortega non remataron a proba.
O Europeo comezou coa disputa da proba júnior feminina, sobre a distancia sprint (750 metros, 20 quilómetros e 5 quilómetros). Entre as inscritas, a pontevedresa Carmen Gómez, que acudía sen presión algunha. Gómez é aínda cadete, polo que este Europeo se presentaba coma unha oportunidade para aprender. E tanto que aprendeu, moito máis rápido do esperado.
A galega estivo ben dende o principio. Fixo unha magnífica natación no lago Schwarzsee (o seu punto forte), que lle permitiu saír da auga na cuarta posición e case pegada ás deportistas que ían por diante. Así, enfrontaron a saída da transición un grupo de dez triatletas que despois quedou reducido a oito integrantes. Pero sempre, entre elas, a nosa Carmen Gómez.
Así, chegaron á segunda transición ese grupo de oito deportistas, con Coldwell na primeira posición e Carmen, que fixo o mellor tempo neste sector, sexta. Comezou a carreira a pe a un ritmo moi forte, pero a galega non se rendeu, aínda que se formou un grupo de tres deportistas por diante, con uns 80 metros de distancia sobre Kristenssen e Gómez. E xa non houbo sorpresas: Triunfo para Laura Lindemann (Alemaña) que foi a máis rápida correndo, cun tempo de 01:03:14. Segunda foi Audrey Mirlo (Francia) e bronce, a tamén francesa Cassandre Beaugrand. Carmen chegou nunha espectacular quinta posición (01:04:42), que sabe a gloria. Foi a primeira española e cunha vantaxe moi ampla: Cecilia Santamaría foi 17ª e Marta Sánchez, 38ª.
Na proba de elite, as noticias non foron positivas para as galegas. Melina Alonso e María Ortega abandonaron por hipotermia no segmento de ciclismo, que estivo marcado polo choiva.
Mañá. O sábado 21 de xuño será o momento da celebración das probas masculinas e do paratriatlon. A máis madrugadora será Susana Rodríguez, xa que comezará ás 08:00 horas. Susana Rodríguez (con Mayalen Noriega coma guía) competirá en PT5 (deportistas con deficiencias visuais) unha vez solucionado o problema que a deixaba fóra do Europeo (por un despiste na inscrición por parte da Federación Española). A viguesa ten a ilusión de logralo título, como xa fixo no Campionato do Mundo de Duatlón de Pontevedra hai unhas semanas.
Posteriormente, ás 13:00 horas, comezará a proba júnior masculina, co vigués Antonio Serrat (Tri-Penta Terras de Lugo) disposto a loitar polos primeiros postos. O pasado ano foi sétimo no Europeo e agora, cun ano máis de experiencia, tentará loitar polo podio. En total, sairán a competir 75 deportistas.
Ás 15:00 horas será o momento dos deportistas seniors. Entre os participantes destaca a figura de Alistair Brownlee, que esta tempada comezou a competir a mediados de maio, por culpa dunha lesión. Pero non están inscritos Gómez Noya ou Mario Mola, centrados nas probas das Series Mundiais, xa que está en xogo o título de campión do mundo. Na loita polo Europeo contaremos cos “galegos” Fernando Alarza (subcampión do mundo sub 23) e Ricardo Hernández, con ganas de facer algo importante, nunha lista de 73 participantes.
E o campionato de Europa rematará o domingo 22 cos grupos de idade (distancia standard) e as probas de relevos júnior (13:00 horas) e sénior (15:30 horas). Os equipos están formados por catro deportistas (dous homes e dúas mulleres) que realizarán un mini-tríatlon. Os integrantes dos relevos non se coñecerán ata o día anterior pola tarde, despois de saber como remataron as probas individuais.
