Coñece o básico do Péntatlon Moderno coa FEGATRI

12 de Agosto de 2013

O Péntatlon Moderno é un deporte cun século de historia olímpica, dende os Xogos de Estocolmo 1912, que comprende cinco disciplinas doutros cinco deportes diferentes.

As probas que o conforman a nivel sénior, tanto masculino como feminino, son:

1. Esgrima

Cada participante enfróntase coa espada, un a un, a tódolos demais pentatletas, en asaltos de até un minuto, sendo suficiente un único tocado para ser o vencedor.

Se remata o minuto sen tocados ou só con tocados dobres (cando se tocan os dous a vez, que non contabilizan) ámbolos dous serán considerados perdedores.

O número de puntos varía segundo o porcentual de vitorias -os que gañan o 70% dos asaltos obteñen 1000 puntos-.

2. Natación

As series determínanse segundo o mellor tempo no ranking de Péntatlon Moderno.

Os competidores nadan unha distancia de 200 metros libres. Tódolos que completan o percorrido dentro do tempo de 2 min 30 seg gañan 1000 puntos. Cada 0,33 segundos suman ou restan 4 puntos.

3. Equitación

Cada atleta participa nun sorteo 30 minutos antes da proba para coñecer con que cabalo competirá.

Dispútase nun percorrido de 350 m a 400 m, con 12 obstáculos -con, obrigatoriamente, un dobre e outro triplo- de 1,20 m de altura e una grandaria máxima de 1,30 m. de alto e 1,50 m. de ancho.

Os competidores comezan con 1200 puntos que van sendo deducidos segundo o seu desempeño, cada falta cometida desconta 40 puntos.

4 e 5. Proba combinada

Carreira sobre unha distancia de 3.200 m, combinando cada 800 m con 5 brancos a unha distancia de 10 m con pistola.

A saída faise por “hándicap”: aquel que estea mellor colocado ao final das tres primeiras probas sairá en primeiro lugar na proba combinada (carreira e tiro) -os intervalos de saída baséanse na diferenza entre as puntuacións -. O vencedor da competición será o pentatleta que cruce primeiro a liña de meta.

A proba consta de catro paradas na zona de tiro -dispárase co obxectivo de acertar cinco tiros no branco nun tempo máximo de 50 segundos (1min 10 segundos para as categorías Youth)- e dunha carreira de 800 metros (totalizando 3.200 metros).

Os 2.000 puntos sitúanse nun tempo de 13´20´´, tendo un valor de 4 puntos cada segundo.

O pentatleta realiza tódalas probas nun só día.

Os Junior compiten sobre un péntatlon igual á categoría Senior (Junior:18, 19 e 20 anos).

Youth A ou Xuvenil (16 e 17 anos), compiten igual que os anteriores pero sen hípica.

Youth B ou Cadete (14 e 15 anos), nas probas internacionais non teñen nin hípica, nin esgrima. Nas probas en España, si teñen esgrima. E a combinada é sobre unha distancia de 2.400 m. , en series de 800 m. , facendo dúas paradas no tiro, para derribar cinco brancos en cada unha delas.

Youth C ou Infantil (12 e 13 anos). Compiten en 3 probas facendo 100 m. de natación e un combinado de 1.600 m., en dúas series de 800 m.

Youth D ou Alevín (10 e 11 anos). Compiten en 3 probas facendo 50 m. de natación e carreira e tiro por separado (corren 500m. e tiran 10 brancos).

Youth E ou Benxamín (8 e 9 anos). Compiten en 3 probas, facendo 25 m. de natación, corren 500 m. e disparan 10 tiros sobre os brancos da combinada.

 

Se queres saber máis, non te perdas este vídeo coas galegas Eva Basanta e Aroa Freije

[youtube id=”SnSveN9ylXY”]

Máis información no regulamento da Federación Española de Péntatlon Moderno

Quizáis che interese…

Galegos con maiúsculas

Galegos con maiúsculas

Antonio Serrat, Susana Rodríguez, Antonio Benito, Cidade de Lugo Fluvial, Pablo Dapena e as...