- Os Campionatos de España de Tríatlon Cadete, Xuvenil e Júnior, e de Remudas Mixtas de Talentos, última xornada da Liga Talento de Tríatlon, reunirán a máis de milleiro e medio de triatletas na Coruña esta fin de semana.
- O centro principal das competicións volverá ser a zona de baños de Marina Parrote, o paseo marítimo do porto e a súa contorna, e a xa emblemática meta da proba situada na praza de María Pita.
- A presentación oficial celebrouse no Concello da Coruña, coa participación de Nereida Canosa, concelleira de Benestar Social, Participación e Igualdade da Coruña; Roberto García, secretario xeral para o Deporte da Xunta de Galicia; Jorge García, director de Competicións da Federación Española de Tríatlon; e representantes dos clubs coruñeses Hércules XTRM, Triatlón Atlántico e Triatlón Coruña.
- A Coruña volverá albergar unha das citas do circuíto nacional de promoción para categorías de base Pho3nix Kids Triathlon Series by Javier Gómez Noya o sábado 20 de xuño.
A Coruña acolle esta fin de semana os Campionatos de España de Tríatlon Cadete, Xuvenil e Júnior, así como os nacionais de Remudas Mixtas de Talentos, última xornada da Liga Talento de Tríatlon da Federación Española de Tríatlon, dedicada ás categorías cadete e xuvenil. As espectaculares competicións, en circuítos curtos e rápidos, reunirán máis de 1.500 triatletas e volverán ter como centro principal a zona de baños de Marina Parrote, onde se disputará o segmento de natación. O ciclismo desenvolverase polo paseo marítimo do porto e a súa contorna, compartindo escenario coa carreira a pé, que levará os deportistas ata o Castelo de San Antón antes de afrontar a xa emblemática meta situada na praza de María Pita.
A presentación oficial celebrouse no Concello da Coruña coa participación de Nereida Canosa, concelleira de Benestar Social, Participación e Igualdade da Coruña; Roberto García, secretario xeral para o Deporte da Xunta de Galicia; Jorge García, director de Competicións da Federación Española de Tríatlon; e representantes dos clubs coruñeses Hércules XTRM, Triatlón Atlántico e Triatlón Coruña.
Nereida Canosa sinalou durante a presentación que “A Coruña vive o deporte e acompáñao; o deporte forma parte da identidade colectiva da cidade”, destacando ademais que “o tríatlon ten unha grande vinculación coa cidade e é un vehículo perfecto para amosar os escenarios máis espectaculares da Coruña ao mundo do deporte”.
Pola súa banda, Roberto García incidiu tamén nesta idea, destacando “a práctica dun deporte de alto nivel no mar e nas rúas da cidade”, e resaltando que “o tríatlon é un deporte que se caracteriza polo sacrificio e o esforzo en todos os seus segmentos”. Desde a Xunta de Galicia quérese “atraer eventos deportivos ao territorio. É unha maneira de entender o deporte e de situar a Coruña e Galicia no mapa nacional e internacional de todas as disciplinas deportivas”.
Jorge García destacou que “xa son varios anos de colaboración e temos un gran entendemento co Concello, coa FEGATRI, co resto das administracións e, por suposto, cos clubs de tríatlon da Coruña, cuxo desenvolvemento simboliza tamén o valor deste evento”. Ademais, subliñou que “máis de 1.600 deportistas estarán aquí, e representan o futuro do tríatlon español. É unha participación extraordinaria que demostra que se están facendo ben as cousas nas categorías inferiores. Deportistas, clubs e familias queren vir competir á Coruña; é unha cidade que invita á participación”.
Mónica Flores, en representación da Federación Galega de Tríatlon, agradeceu “o compromiso do Concello e da Xunta, sen os cales o tríatlon non podería ter a presenza que ten en Galicia nin sería posible organizar este campionato”. Tamén agradeceu “a confianza da FETRI, que permite que a nosa canteira e a de todo o tríatlon nacional continúen medrando e desenvolvéndose”.
Eventos FETRI de Tríatlon A Coruña 2026
O sábado 20 de xuño disputarase o Campionato de España de Tríatlon Cadete, Xuvenil e Júnior, con distancia SuperSprint e series clasificatorias en cada unha das categorías a partir das 16:00 horas, das que sairán os participantes para as finais que se celebrarán ao longo da tarde. As finais cadetes disputaranse ás 19:00 horas, as xuvenís ás 19:30 horas e as júnior ás 20:00 horas.
O domingo 21 de xuño, a partir das 11:30 horas na categoría masculina e das 12:15 horas na feminina, celebrarase tamén o Campionato de España de Tríatlon Júnior en distancia Sprint.
Campionato de España de Tríatlon por Remudas Mixtas de Talentos 2026
A sexta e última xornada da Liga Talento de Tríatlon, dedicada ás categorías cadete e xuvenil, disputarase o domingo 21 de xuño. Dúas triatletas femininas e dous triatletas masculinos de cada club iranse remudando para completar, cada un deles, un tríatlon de distancia SuperSprint, ata que a cuarta remuda decida a carreira na liña de meta.
Pho3nix Kids Triathlon Series by Javier Gómez Noya 2026 A Coruña
O sábado 20 de xuño celebrarase tamén na zona de Marina Parrote unha proba do circuíto nacional Pho3nix Kids Triathlon Series by Javier Gómez Noya 2026, con carreiras de promoción para as categorías Prebenxamín, Benxamín, Alevín e Infantil, con saídas a partir das 11:00 horas e distancias adaptadas a cada categoría. As e os participantes recibirán unha camiseta de agasallo e unha medalla de finisher.
Ligas de Tríatlon de Talentos 2026
O Club Deportivo Delikia, na Primeira División Feminina, e o Tribarros Villafranca, na Primeira División Masculina, lideran as Ligas Nacionais de Tríatlon de Talentos 2026 tras a disputa de tres xornadas de dúatlon en Cidade Real e Avilés, e dúas de tríatlon en Águilas.
As clasificacións finais decidiranse na cita da Coruña. Na categoría feminina, ao Delikia ségueno o Náutico de Narón e o Cidade de Lugo Fluvial. Na masculina, Delikia e Laguna de Duero ocupan a segunda e terceira posición, respectivamente.
Eventos FETRI A Coruña 2025
A Coruña acolleu no ano 2025 outra das grandes citas do calendario da FETRI, o Campionato de España de Tríatlon, no que se proclamaron vencedores Sara Guerrero e Genís Grau. Na categoría júnior, que volverá disputarse na cidade os días 20 e 21 de xuño, os triunfos foron para Cristina Jiménez-Orta e Héctor Tolsá.
