MÁIS DE 70 EQUIPOS DARANSE CITA EN VILAGARCÍA NO CAMPIONATO GALEGO DE TRÍATLON CONTRARRELOXO

11 de Maio de 2018

Máis de 70 equipos participarán en Vilagarcía o domingo 13 de maio no Campionato Galego de Tríatlon por equipos contrarreloxo. Ademais do Galego absoluto, tamén se celebrará o Campionato Escolar e unha proba open.

Nesta modalidade de contrarreloxo, os equipos van saíndo de xeito escalonado cada minuto, e estarán compostos por entre 4 e 6 compoñentes, que terán que disputar a proba agrupados. Ao final contara en meta o tempo do cuarto integrante do club, despois de completar un percorrido de 750 metros de natación,  20 quilómetros en bicicleta e 2,5 quilómetros de carreira a pe. A saída, transición e meta estarán instaladas no Peirao de pasaxeiros do Porto de Vilagarcía. Na categoría masculina están inscritos 24 equipos, mentres que na feminina hai 7.

A saída do primeiro equipo escolar realizarase ás 10:00 horas e as distancias neste campionato serán de 300 metros de natación, 10 quilómetros de bicicleta e 2 quilómetros de carreira a pe. A proba Open (na que participarán clubs que estean inscritos no Galego) dará comezo ás 11:10 horas, mentres que a última saída do Galego terá lugar ás 13:10 horas.

2017. Náutico de Narón (feminino) e Arcade Inforhouse (masculino) proclamáronse o pasado ano en Vilagarcía campións galegos de tríatlon por equipos contrarreloxo.

 

Quizáis che interese…

Galegos con maiúsculas

Galegos con maiúsculas

Antonio Serrat, Susana Rodríguez, Antonio Benito, Cidade de Lugo Fluvial, Pablo Dapena e as...