MARÍA ORTEGA, 13ª NA COPA DO MUNDO DE CHENGDOU

10 de Maio de 2014

María Ortega fixo un gran papel na Copa do Mundo de Tríatlon de Chengdou (China), a terceira do circuíto, ao lograr finalizar a proba na 13ª posición e sumar así moitos puntos para o ránking ITU. Non estivo igual de afortunada Melina Alonso, que rematou na posición 31ª e non puido puntuar.

O certo é que as dúas triatletas galegas estiveron rodeadas de dificultades dende o inicio. O visado foi concedido con moito retraso e as deportistas chegaron a China só unhas horas antes do inicio da proba. Así, sen aclimatación algunha, cun enorme cambio horario, moita calor e sen neopreno para a natación por primeira vez na tempada, tiveron que enfrontar a proba. María Ortega fixo unha boa natación e saíu no primeiro grupo da auga, o cal lle permitiu estar sempre en cabeza e lograr así a 13ª posición cun tempo de 2:03:46, que lle outorga moitos puntos, fundamentais sobre todo de cara a participar en Series Mundiais. A gañadora da proba foi a australiana Gillian Backhouse cun tempo de 2:01:04.

Sen embargo, Melina Alonso non estivo cómoda na auga sen neopreno e quedou descolgada na natación, e xa foi imposible para ela remontar. Ao final, chegou na posición 31 (2:12:40) e non puntuou para o ránking. A próxima semana ambas participarán na proba das Series Mundiais de Yokohama.

Quizáis che interese…

Galegos con maiúsculas

Galegos con maiúsculas

Antonio Serrat, Susana Rodríguez, Antonio Benito, Cidade de Lugo Fluvial, Pablo Dapena e as...