Mireia Vázquez e Claudia Gámez lograron hoxe a medalla de ouro na Copa de Europa de Sant Boi, que era ademais a primeira proba do Campionato de España de categorías menores (de benxamín a cadete) de Péntatlon Moderno.
A Federación galega desprazou a Barcelona a unha selección de sete deportistas. Mireia Vázquez acadou a primeira posición en benxamín feminino, por diante de dúas catalás. Así, enfronta a segunda proba do campionato de España, que se celebrará en Santander a mediados de maio, con vantaxe.
Claudia Gámez, ouro infantil feminino.
En infantil feminino, Claudia Gámez subiu ao máis alto do podio, que foi completado por dúas francesas. Ademais, hai que destacar a cuarta posición de Mercedes Vila, que foi a segunda española. Polo que ambas parte como favoritas para o título de campioa de España na súa categoría.
Ademais, Mireia Vila foi quinta en benxamín feminina; Héctor López tamén ocupou a quinta posición en benxamín masculino e ese mesmo posto foi para Manuel Cobas en alevín masculino. En infantil mascúlino Óscar López Saavedra foi sétimo na xeral, pero terceiro español, cara ao Campionato de España.
A competición constaba dunha proba de natación e doutra de combinada (carreira+tiro) e o que variaban eran as distancias dependendo da categoría que se disputase. A segunda fase do Campionato de España de Péntatlon Moderno para categorías menores celebrarase en Santander a mediados de maio (19-20).
