O programa “Nada e Corre” do 2016 celebra este domingo 7 de febreiro a terceira proba zonal -clasificatoria para a final galega- nesta oportunidade en Riveira, coa participación de preto de 140 deportistas de categorías menores. Este ano o programa ten as novidades da incorporación da categoría prebenxamín e do paratríatlon (deportistas con discapacidade).
O Nada e Corre comezará as 10:00 horas do domingo 7 de febreiro coa celebración da proba de natación na piscina da Fieiteira, para posteriormente realizar a carreira nas pistas de atletismo do mesmo complexo deportivo. Hai inscritos 9 prebenxamíns, 24 benxamíns, 33 alevíns, 42 infantís e 27 cadetes (masculinos e femininos).
Este programa, que comezou no 2012 promovido pola Federación Galega de Tríatlon, ten como obxecto traballar en inverno a natación e a carreira. O programa “Nada e Corre”, que se desenvolve no primeiro trimestre do ano, está formado por catro probas clasificatorias zonais e unha final. Na final estarán os catro mellores de cada proba clasificatoria por categoría e sexo.
As distancias a realizar dependerán das categorías:
- Prebenxamín: 25 metros de natación e 250 de carreira a pe.
- Benxamín: 50 metros de natación e 500 de carreira a pe.
- Alevín: 100 metros natación e 500 carreira a pe.
- Infantil: 200 metros natación e 1.000 carreira a pe.
- Cadete: 400 metros natación e 2.000 carreira a pe.
