CAMILA ALONSO E ANTONIO SERRAT, CAMPIÓNS GALEGOS DE TRÍATLON 2018

19 de Agosto de 2018

Camila Alonso (Tríatlon Ferrol) e Antonio Serrat (Tri-Penta Terras de Lugo) proclamáronse hoxe en Ferrol campións galegos de tríatlon 2018. Foron dúas probas apertadas e fermosas, nas que o tríatlon galego volveu amosar as súas credenciais, con deportistas dun altísimo nivel.

Na proba masculina a natación foi moi rápida con Carlos Brión marcando o ritmo. Pero os favoritos lograron colocarse e saíron ben da auga, con Antonio Serrat na terceira posición e Luismi Velásquez (Tri-Penta Terras de Lugo) na segunda. A bicicleta foi decisiva. De entrada formouse un grupo de tres deportistas con Serrat, Velásquez e Cendán, pero na segunda volta o vigués aproveitou unha subida adoquinada para atacar e escaparse, aínda que Luismi reaccionou e logrou pillalo. Así os dos compañeiros do Terras de Lugo fixeron xuntos as dúas últimas voltas de ciclismo e abriron distancias claras cos perseguidores.

Na carreira a pe, Antonio Serrat -campión galego nos anos 2015, 2016 e 2017- marcou o seu ritmo e logrou escaparse para chegar a meta en solitario e proclamarse gañador do XVIII Tríatlon Concello de Ferrol e do Campionato Galego de Tríatlon 2018 cun tempo final de 58:52. Segundo e subcampión galego foi Luismi Velásquez (1:01:10) e terceiro, Andrés Cendán (Cidade de Lugo Fluvial) cun tempo final de 1:01:47.

Na categoría feminina, as deportistas do Tríatlon Ferrol, que competían en casa, foron protagonistas.  Da auga saíu un grupo de 8 deportistas, con todas as favoritas (Camila Alonso, Carmen Gómez, Joselyn Brea, Edymar Brea, Saleta Castro ou Inés Santiago), e na bicicleta lograron abrir distancias Camila Alonso e Carmen Gómez, mentres que Joselyn tivo que abandonar despois de varios mareos.

As dúas deportistas de cabeza lograron case minuto e medio de distancia sobre as perseguidoras de forma que o título galego tiña que decidirse na carreira a pe entre elas. E aí foi máis rápida Camila Alonso que logrou proclamarse campioa galega cun tempo final de 1:07:42. Carmen Gómez foi segunda e subcampioa (1:08:08), mentres que a terceira posición foi para Edymar Brea (1:09:44). De destacar a cuarta posición de Saleta Castro (Cidade de Lugo Fluvial), máis acostumada ás longas distancias, ou a sexta da cadete Elsa Pena (Cidade de Lugo Fluvial).

Os gañadores noutras categorías do Galego foron:

  • Cadete: Elsa Pena (Cidade de Lugo Fluvial) e Jorge González (Natación Riveira)
  • Júnior: Maria Lois (Arcade Inforhouse) e Iván Puentes (Tríatlon Ferrol)
  • Sub 23: Carmen Gómez (Tríatlon Ferrol) e Antonio Serrat (Tri-Penta Terras de Lugo)
  • Veteran@ 1: Aída García (Tríatlon Rías Baixas) e Pedro Pablo Bernárdez (Tríatlon Vilagarcía)
  • Veteran@ 2: Purificación López (Club Hércules Termaria) e Andrés López (Tríatlon Vilagarcía)
  • Clubs: Tríatlon Ferrol (feminino) e Tri-Penta Terras de Lugo (masculino).

O Galego disputouse sobre a distancia sprint (750 metros de natación, 20 quilómetros de ciclismo e 5 de carreira a pe) e a saída, transición e meta estaban instaladas no porto de Ferrol.

CAMPIONATO GALEGO SPRINT 2018 FERROL

TRIFERROL 2018

Quizáis che interese…

Galegos con maiúsculas

Galegos con maiúsculas

Antonio Serrat, Susana Rodríguez, Antonio Benito, Cidade de Lugo Fluvial, Pablo Dapena e as...